Pormuladong Dasal
“Sa pananalangin ninyo’y huwag kayong gagamit ng napakaraming salita gaya ng ginagawa ng mga Hentil.”
Ang mga salitang ito’y ginagamit ng ilang mga Cristiano para tuligsain ang kaugalian ng Simbahan tungkol sa pormuladong mga dasal tulad ng Rosaryo. Sa kagustuhan nilang palabasing mali ang Simbahan tuwing may pagkakataon (tama lang sa pangalan nilang Protestante), hindi nila napapansin na simpleng lohika lang ay lumalampas pa sa kanilang paningin.
Sa konteksto ng sinasabi ni Jesus tungkol sa tamang pananalangin, ang kinokondena niya ay ang pagpapaimbabaw ng mga Pariseo, at ang maling paniniwala ng mga Hentil, na para bang mapapahinuhod nila ang Diyos sa pamamagitan ng maraming salita tulad ng tao na kailangan ng paliwanag. Sa halip, si Jesus mismo ang gumawa ng isang porma ng panalangin dahil ayon sa kanya ay alam na ng Diyos ang kailangan ng tao bago pa man niya ito sabihin. Ang paggamit ng maraming salita ang tinutuligsa ni Jesus (dahil ang Diyos ay hindi tao) hindi ang pag-ulit ng parehong mga salita. Dahil kung bumuo si Jesus ng isang dasal, at itinuro ito sa kanyang mga taga-sunod, nangangahulugan lang na inaasahan niyang araw-araw itong dadasalin ng mga Cristiano, o higit pa dun—tulad ng hinihingi ng isa sa mga pinakamatandang katuruan ng Apostolikong Iglesya na matatagpuan sa Didache—tatlong beses sa isang araw dapat dasalin ang panalanging itinuro ni Jesus. Kung hindi inaayunan ni Jesus ang paggamit ng maraming salita sa pagdarasal, nangangahulugan na itinuturo niyang gumamit lamang ng mga salitang nakalulugod sa Diyos, at ito ang dasalin araw-araw, sa halip na libutin ang buong diksyunaryo para lang maintindihan ng Diyos.
Kung hindi pa rin ito katanggap-tanggap para sa mga tumutuligsa sa Simbahang pinangakuan ni Jesus ng proteksyon laban sa kapangyarihan ng Hades, tingnan na lang nila mismo si Jesus habang nagdarasal sa Getsemani. “Iniwan niya uli ang tatlong alagad at muli siyang nanalangin, at iyon din ang sinabi.” Hindi pa ba malinaw na hindi lamang itinuro ni Jesus ang panalanging dapat ulit-ulitin ng mga Cristiano, kundi siya mismo ay nagpakita ng halimbawa nito nang tatlong beses siyang nanalangin gamit ang pareho ring mga salita? Ito ba ang sinasabi ng iba na maling paraan ng pagdarasal? Bakit hindi nila tuligsain si Jesus na nagtuturo at gumagawa nito?
Hindi ba’t ang mga salmo ay pang-liturhiyang panalangin din ng mga Judio? At hindi ito tinututulan ni Jesus o ng mga apostol, sa halip ay laging ipinapaalala na manalangin gamit ang mga salmo at imno. Kung gagamitin lagi sa pananalangin ang mga salmo at imno, mangangahulugan ito ng pag-uulit-ulit ng mga salita habang nananalangin. Ito ba ang tinatawag ni Jesus bilang masama? Maging ang mismong mga tao ngayon na nagsasalita laban sa mga pormuladong dasal ay gumagamit din nito sa kanilang mga pagtitipon, dahil sila man ay kumakanta rin ng mga awit ng papuri. Hindi ba’t ang papuri ay panalangin, at ang laging pag-awit nito ay pag-uulit-ulit ng parehong panalangin? Sino na ngayon tutuligsain nila? Ang mga Judio? Si Jesus? Ang mga apostol? Ang Simbahan? Ang sarili nila? Ang mga Muslim na paulit-ulit na bumabanggit ng Allahu Akbar? Ang mga Buddhist? Ang mga Hindu na walang tigil sa pagsambit ng kanilang mantra? Para lang masira nila ang Simbahang itinatag ni Jesus, di na nila pinapansin ang ibang bagay. Sino man sa mga nabanggit ang kanilang tuligsain, magiging patungkol pa rin kay Jesus ang kanilang mga pagpoprotesta at kasama din nilang hinahatulan ang kanilang mga sarili.
Elmer said,
September 10, 2007 at 3:20 pm
Hindi naman masama kung paulit ulit mong purihin ang diyos na lumikha ng lahat ng bagay, gaya ng awit, himno at mga katulad, pero ang ang hindi maganda ang paulit ulit mong purihin ang hindi diyos gaya ni Maria.
si Maria ay kinasangkapan lamang ng diyos pra matupad ang hula na ang hari ng israel ay ipanganganak sa sabsaban.
vanillae said,
September 13, 2007 at 5:12 am
Ang totoo, hindi naman galing sa bagong panahon ang mga kataga sa sinasabi mong pagpupuri kay Maria na ina ni Jesus. Ito ay nanggaling sa Kasulatan tulad ng pag-ampon natin sa ibang mga teksto ng Biblia para gawing bahagi ng ating panalangin. Hindi galing sa tao ang papuring pagbating ito kay Maria kundi galing sa Diyos sa pamamagitan ng isang anghel: Hail, full of grace! The Lord is with you. Ang sumunod na bahagi naman ay mga salita ni Isabel na noong panahong iyon ay puspos ng Espiritu Santo: Blessed are you among women, and blessed is the fruit of your womb. Ang natitirang kalahati, bagamat hindi teksto ng Biblia ay nagpapahayag ng katotohanan: (1) na si Maria ay ina ni Jesus (2) na ang tao ay makasalanan at (3) kailangan nila ang panalangin ng isa’t-isa. Sa bahaging ito ginagawa ang pagluhog o pakikiusap kay Maria na “ipanalangin mo kami”, tulad ng pabor na madalas nating hinihingi sa kapwa Cristiano na pinagkakatiwalaan natin, at pinaniniwalaang pakikinggan ng Diyos.
Hindi lang si Maria ang paulit-ulit na pinupuri ng mga tao, dahil sa Biblia mismo ay makikita natin kung paano purihin ang mga tao nang mga nagdaang panahon, at ilan sa mga nangunguna ay sina David, Ruth, Daniel, at marami pang iba. Pero higit sa kanilang lahat, kinalala ng anghel ang mataas na karangalan ni Maria, hindi lang bilang magiging ina ng Tagapagligtas, kundi bilang nag-iisang tao, bukod kay Jesus, na puno ng grasya.
Bukod dito, kaming mga Katoliko ay kumikilala sa Simbahan bilang isang malaking pamilya ng Diyos na binubuo ng mga banal ng Diyos na nasa langit at nasa lupa. Dahil dito, matuwid lang na alalahanin namin ang mga nasa piling na ng Diyos at bilang kapatid ay humingi sa kanila ng pabor na ipanalangin kaming mga nasa lupa pa. Hindi namin sila pinupuri na parang Diyos, o kaya’y dinadasalan na para bang mayroon silang sariling kapangyarihan. Sa pamamagitan ng pag-alala sa kanilang buhay at mga katangian, nagiging inspirasyon sila sa mga pinanghihinaan ng loob sa paglalakbay sa daan ng Panginoon. Sa pamamagitan din ng pagluhog sa kanila ay binibigyan ng lakas ng Diyos ang bawat dumadalangin alang-alang sa tulong na panalangin ng mga banal na nasa piling niya.
Kung magiging makatotohanan lang tayo, bukas ang isip, at tumitingin sa praktikalidad ng mga nangyayari sa paligid natin, hindi magiging mahirap unaawain ang mga bagay ng Diyos.
Mister "Nano" said,
April 18, 2009 at 4:57 pm
Walang sinuman ang pwedeng humusga sa sinseridad ng isang tao sa kanyang pagdarasal at hindi kailanman maaring gawing basehan ang pagbabasa ng isang katoliko sa kanyang dasal upang isiping hindi bukal sa puso niya ang kanyang pagdarasal. Hindi por que binabasa ay hindi ito sinsero.
Isa ring maling notion na isipin na ang pagdarasal naming mga Katoliko ay limitado lamang sa pormulado, memorized, or binabasang mga panalangin. Maaari din kaming manalangin ng sarili naming panalangin gamit ang mga salitang kusang lumalabas sa aming mga isipan.
Ang sinasabi ninyong pormuladong panalangin ay ginagawa ng simbahang Katoliko upang sa iisang salita at diwa ay “sabayang” nananalangin ang buong SIMBAHAN. Ano naman ang masama kung lahat kami ay sabay manalangin ng AMA NAMIN na mula pa sa aming kabataan ay kinabisado na namin. Hindi naman por que kabisado na namin e hindi namin iniintindi kung ano ang aming sinasabi sa panalangin na iyon.
Sa kaso naman ng paulit ulit na panalangin, ang ibig sabihin ni Jesus na panalangin na paulit ulit na sinasambit ng mga Hentil ay yaong mga panalanging hindi naman sa tunay na Diyos nila iniuukol at yaong ang mga salita ay hindi maintindihan (o sa ingles ay, gibberish).
Ngunit ang sinasabi ninyong panalangin na paulit ulit na ginagawa naming mga Katoliko ay hindi gibberish, kundi mga salitang naiintindihan namin maging ninyo kaya nga alam ninyong paulit ulit kasi naiintindihan ninyo ang mga salita na ginagamit namin. At higit sa lahat, ang mga panalangin namin, bagamat ang ibang bahagi ay paulit ulit, ay iniuukol namin sa iisang Diyos — ang Diyos na inyo ring pinaniniwalaan.
Pag ang isang bata ay gusto bumili ng chokolate pero ayaw siyang bilhan ng kanyang tatay, ano ang karaniwang ginagawa niya? Hindi ba, uulit ulitin niya ang kanyang kahilingan, makalawa, makatlong beses, hanggang sa ang kanyang ama ay pumayag na ibili siya ng gusto niyang chocolate?
Yan ang rason kung bakit namin inuulit ulit ang aming mga panalangin
hindi namin yan ginagawa para lamang mapahaba ang aming mga panalangin
stephanie genilla said,
June 9, 2009 at 11:18 am
as long as naniniwala kayo kay hesus
it doesn’t matter kung pano mo isinagawa ang
iyong dasal as long na sincere ka sa kalooban mo
na parang kinakausap mo siya ngnit sa magalang na paraan.
dahil ibat iba ang bersyon ng mga tao sa pakikipagtalastasan,
hindi ba?
basta ang masasabi ko lang magdaal tayo araw araw at humingi ng gabay
sa may kapal…
yun po ang sinasaloob ko…
stephanie genilla said,
June 9, 2009 at 11:28 am
mahal na panginoon
hari ng langit at awa
patawarin niyo po kaming mortal sa mga nagawa
naming hindi niyo ikinasiya…
lalong lalo na po kapag kami’y nakakasakit ng
aming kapwa na siya narin naming ipinapadama sa inyo.
tulungan niyo po kaming mabago ang aming pagkakamali
lubos naming pinagsisisihan ang aming nagawa
humihingi kami ng awa at gabay upang matahak
namin ang tamang daan patungo sa inyo at banal na ama
sa langit.
diyos ko po hari ng langit humihingi kami ng tawad…
amen.
.
stephanie genilla said,
June 9, 2009 at 11:47 am
mahal na panginoon hesus
lubos kaming nagpapasalamat sayo
isang simpleng pasasalamat na tinumbusan
mo ng iyong banal na buhay upang kami ay maligtas
sa mga kasalanang nais angkinin ang iyong mga tupa
ay iyong sinalba… tunay kang mapagalagang pastol
maraming salamat rin sa iyo mahal at banal na ama
maraming salamat sa mga pagsubok na aming nararanasan
upang kami ay lalo pang tumatag,
salamat sa king pamilya na iyong ipinagkaloob sa akin
upang dumamay sa akin sa oras ng pangangailangan
salamat sa lahat ng nakikita ko sa aking paligid
ang puno, ang halaman at ang mga hayop na nagbibigay
sa amin ng pagkain upang maipagpatuloy ang aming buhay
at lubos sa lahat ang buhay na pahiram niyo sa amin
ay subra sobra na ngunit alam kong magbalik loob lang kami sayo
ay sapat na maraming salamat po
amen…
Yhiz Grajo said,
September 1, 2009 at 2:25 am
Karapat dapat at matuwid lamang na pasalamatan natin si Maria sa pamamagitan ng papuri na mula s anghel na si Gabriel sapagkat kung hindi sa kanyang pagsagot ng oo sa plano ng Diyos ay hindi natin makakamtan ang kaligtasan.